pituah urang awak "Pasan Mandeh" yo bana manyasak dado dibaco

Oi Nak kanduang sibiran tulang, Buah hati limpo bakuruang
Ubek jariah palaraij asa damam, Sidingin tampa di kapaloh
Dima kini nak?

Lah lewat pulo hari rayo
Sabanta lai lah nio tahun baru pulo
Pangana jauah diputiah mato
Maingek nak kanduang di tanah jawo
Ndak ado kaba ciek pun barito
Mandeh manunggu jo ati ibo
Apo lah lupo jo mandeh kanduang nak?
Ibo hati mandeh nak..
pituah urang awak "Pasan Mandeh"

Kalau diliek dipandangi nak, Dicaliak umua nan tapakai
Badan Mandeh baransua tuo.
Nyampang tibo saruan Allah,  Aja sampai angok malayang.
Ditanah sirah badan tabujua
kain kafan panyalimuik dingin, Batu nisan nan tandonyo
Apo harus jo takdir kematian tu manyilau mandeh nak?
Pulang juo lah nak..
Silau lah Mandeh walau sabanta..

Oh nak kanduang dirantau urang
Jikok rami galeh takambang
Galak gadang ati pun sanang
Tapi jan lupo sawah jo pimatang
Ndak elok dipaturuikkan ati gadang
Ingek kabun sarato ladang
Tampek mandeh bakureh mambantiang tulang

Ndak Mandeh harok ameh jo parmato doh nak
Nan mandeh taragak hanyo badan diri nak
Nan ka mambuek batin ko pueh katiko babimbiang tangan karipuik mandeh ko bakumpua basamo
Hanyo itu nak..
Hanyo itu..

Takalo maso dulunyo nak, Awal mulonyo insan kalahia
Mandeh di dalam pasawangan, Sakik nan indak tatahankan
Pakiak mamacah haniang malam
Lua ka Allah, Bagantuang indak kamano ka manggapai
Dek lamo lambek badayuang, Sapueh-pueh panangguangan sampailah juo di kualo.
Tali turun sauh dibuang, Kapa marapek di tapian balabuah surang pasisianyo
Sawajah kapado urang nantun nak, Mandi darah sakujua badan
Kaki malajang-lajang taganggam tangan nan duo
Bunyi pakiak sapanuah kampuang cando pandeka dapek lawan.

Ohh Nak..
Akhianyo lahia juo ka dunia
Bangga nan ndak dapek dikatokan
Bahagia nan bukan alang kapalang
Sakik jo padiah baganti sanang

Taingek carito lamo
Katiko anak malangkah ka rantau urang
Jo linangan aia mato mandeh lapeh
Tangih nan capek basuruakkan
Do'a nan tiok hari basimpuahkan
Hanyo itu nan mandeh kana nak

Bukan harok dek baleh jaso nak
Karano itu kewajiban mandeh
Tapi baa dek mandeh sabuik sadonyo nak?
Karano hanyo itu untuak kini ko nan bisa marintang rusuah
Mailangkan ibo hati

Mandaru kapa tabang dilangik nak
Manapi kapa lauik dipantai
Lah lalu lalang pulo Oto dari jauah
Balinang aia mato Mandeh mamandangnyo

Baharok kok lain nan datang
Kironyo indak juo doh nak, Hanyo angan-angan pamenan kapalo, Rindu nan alun ado ubeknyo.

source: kamuspadang

dibawah ini, posting terbaru kami di twitter "yuk baca and share"

dapatkan pesan dakwah harian di inbox whatsapp anda


Cara daftar
Ketik nama#usia#asal daerah kemudian kirim ke no whatsapp kami ini 0821 6826 4963

Simpan no whatsapp kami dgn nama "1hari 1ilmu"

Jadilah anda petunjuk jalan dan dapatkan setiap kebaikan dari orang yg anda ajak
Kunjungi dan baca artikel lainnya di
kumpulankonsultasi.com
https://telegram.me/mengenalislamyuk

Portal share artikel asatizah, informasi dan berita islam
bantu kami share info ini

cari artikel ?. ketik dibawah ini